انت خريج فاشل

   كانت صدمة بالنسبالى بعد ستطاشر سنة تعليم ..اتخرج وابص على موقعى الاجتماعى القاه تحت الصفر بمرررراحل . واذا كان من الاول عندى يقين انى هتخرج والدولة مش هتهتم بواحد ذى حالاتى .
لانها انتهت خلاص من مهمتها التقيلة بعد ما " حطتنى " فى بداية طريق المأساه الحياتية اللى بيعانى منها الملايين امثالى .

وبعد بحث مضنى لقيت عمل .. هو صحيح " اوجرى " فى محاجر الرخام ورغم انه بعيد تماما عن تخصصى اللى قضيت فيه اربع سنين فرحة وزعل تعب وارهاق . بس كان لازم اقول الحمد لله ناس كتير غيرى مش لاقين الفرصة الذهبية دى .

واشتغلت .. بس كان جوايا سؤال نفسى حد يجاوب عليه ايه علاقة الرخام باللغة العبرية ؟ !!! ولانى انا فى مصر كانت الاجابة واضحة . 

وعدت الايام ولقيت نفسى " صبى " تحت ايد صنايعية متعرفش حتى ( تفك الخط ) ولانى مليش فى الشغلانة دى .. اقدر اقول جربت حظى فى اماكن تانية .

لحد ما جه اليوم اللى قررت اخد حقى كامل من الدولة . وانى لازم ارمى على عاتقها موضوع توظيفى ده .. مش بس كدا .. لا دى كمان لازم تكون فى التخصص بتاعى . بس ساعتها سألت نفسى سؤال هو انا اعرف ايه عن تخصصى ؟!!!!

وفجأة ظهرت مشكلة تانية غير مشكلة العمل كنت بحاول دايما اتحاشاها .. الا وهى وبكل بساطة انى معرفش حاجة فى التخصص بتاعى غير الحروف الابجدية .. يعنى مثلا واحد ذى حالاتى متخصص فى اللغة العبرية من البديهى والمنطقى والواقع اللى مش واقع انى اتخرج من دراستى بجيد اللغة العبرية . ولانى مواطن مصرى اصيل.. اتخرجت  وانا مليش فى العبرى غير بس ابجد هوز .

ومع وقفة طويلة مع نفسى بدأت المشكلة تاخد وجهه تانية خالص . وبدأت ابص على الموضوع من زاوية جديدة .. واخيرا وصلت لحبه حاجات اللى بإذن الله هتكلم عنها بالتفصيل .

لذالك قررت اعمل سلسلة مقالات " وظفنى شكرا " عشان احط جيلى والاجيال اللى بعدى على نقطة الصفر اللى ملقناش حد يحطنا عليها .

إهداء السلسلة إلى ..

* الى جيلى الجانى .. والمجنى عليه .

* الى الاجيال القادمة اللى مش هترحمنا لو مقدمناش ليها حاجة مفيدة .

* وعلى استحياء .. الى الجيل السابق اللى استنى اننا نعمل اللى هو معملوش .

* واخيرا الى كل شاب عاطل قرر بجد يقلع بدلة البطالة الشيك ويلبس تيشرت العمل البسيط .

ma

تعريف & الكاتب

محمود ذيهان شاعر وكاتب مصرى مسلم اعشق كل ما يخص التقنية والانترنت دائما احب ان اتعلم شيئا جديد كل يوم